السلام عليكم
مراجعة للأونروا باند 6 بعد استخدام اسبوع
التصميم
تصميم الباند حلو جدا اول ما شوفتها ع الحقيقة كنت متوقعها أكبر بسبب الصور لكن حجمها طلع كويس جدا وانا شايف انها لسه تصنف كبند مش كساعة ذكية، الاستراب بتاعها كويس وفيه "فتحات كتير" هتظبط على اي ايد
الزرار الوحيد الموجود للتحكم في الباند كويس جدا ومحستش انه تقيل او حاجة
الباند مقاومة للمياه بمعيار 5ATM خد بالك دا مش معناه انها مقاومة لحد 5 متر لأ، دا معناه انه الباند تقدر تتحمل ضغط 5 بار او عمود مائي 50 متر، في الحياة العملية أبانت تقدر تستحمل انك تغسلها بالميه عادي او تغسل ايدك وانت لابسها، بس مش هتكون مناسبة أو الرياضات الميه، واه هتستحمل معاك السباحة بس لحدود معينة انا مش عارفها ممكن تدور فيها وهسيبلك لينك عن الـ 5 ATM في الكومنتات
الشاشة
الشاشة حجمها كويس جدا ولو حطيت واتش فيس خلفيته سوداء هتحس ان الشاشة أكبر، كمان برضو النظام كله خلفيته سوداء فمش هتحس بحواف الشاشة مثلا
ميزة ال raise to wake شغاله بشكل كويس جدا 9 من كل 10 مرات وبتفرق حسب موضع ايدك
ليك حد معين من الواتس فيس اللي تقدر تحملها بتاع 35 واحد مثلا
السطوع بلقائي معمول على المستوى 3 ومحستش اني محتاج إليه في مرة مثلا
مميزات الصحة
وهي يمكن من اهم الحاجات في البند، البند تقدر تقيس ضربات قلبك بشكل متكرر ومستوى الـ stress اللي انت حاسس بيه، تتبع النوم شغال كويس ومش شايفه ميزة مفيدة أوي، لكن اللي شايفه ميزة مفيدة هو المنبة، تقدر تظبط منبه من موبايلك او تطبيق هواوي هيلث واللي هو تطبيق كويس جدا بالمناسبة، والباند تستخدم الاهتزاز بحيث تصحى وكانت شغالة كويس معايا وهي أحسن من المنبهات الطبيعية بتاع الموبايل اللي بتجيب لك انت والبيت صدع D:
تتبع التمارين
الباند تحسب خطواتك بشكل دائم وبرضو لو انت خلعت الباند وكنت ماشي بموبايلك الخطوات هتتحسب في تطبيق هواوي هيلث لكن الباند مش هتلاقي فيها غير الخطوات اللي من الباند
الباند فيها عدد محدود من التمارين، لو تلبسها في جيم مثلا غالبا هتيجي في النص وتعمل other
من اعدادات تطبيق هواوي هيلث تقدر تظبط ال zones بتاع معدل ضربات القلب بحيث الباند تقولك انت في انهي مرحلة من التمرين، هل أنت في التسخين ولا حرق الدهون ولا extreme مثلا
طبعا المنطقه دي بتختلف من شخص للتاني وليها عوامل كتيرة، ممكن تدور في النت ازاي تحسبها وهسيبلك فيديو تحت عن الموضوع دا تفصيلا
لما تكون بتتمرن وانت لابس الباند بيجيلك اشعار كل 10 دقايق ان في 10 دقائق عدوا وبورك عدد الكالوريز المحروقة، الواجهة بتاع التمرين بسيطة جدا بيوريك فوق خالص في الساعة وبعدها في شريط انت في اي مرحلة من التمرين وتحتها ضربات القلب والوقت من ساعة ما بدأت واخيرا الكالوريز المحروقة ولما تخلص بيورك واجهة لطيفة كده لو عملت سكرول لتحت هتلاقى تفاصيل زيادة عن تمرينك، لو كنت بتجري مثلا هتلاقي تفاصيل اكتر من لو كنت عامل حاجة زي others طبعا
لو دست على الزرار هتقدر اما توقف التمرين او تنهيه وكل التفاصيل هتكون موجودة في تطبيق هواوي هيلث
السوفت وير
السوفت وير بتاع الباند مميز جدا، هو نفسه الموجود في ساعات هواوي الذكية اللي معديه 3 آلاف جنيه دي😥
تطبيق هواوي هيلث ممتاز جدا الصراحة وفيه كل اللي انت محتاجه، ممكن في الاول تاخد وقت عقبال ما تتعود وتظبط كل الاعدادات اللي انت عايزها لكن بعدين كلو هيبقى ميه ميه
في طبعا تفاصيل اكتر في السوفت وير هسيبك انت تكتشفها بنفسك 😁
البطارية
البطارية هنا قعدت معايا 8 ايام تقريبا مع تتبع النوم ومنبهات وتتبع ضربات القلب والتمارين، ولسه كان باقي 15% لما تيجي تشحنها مش هتاخد وقت كتير، انا حطيتها لمدة 40 دقيقة تقريبا شحنت لحد 75% بعدها الشحن بيبدأ يكون بطيء لكن ال75% كفاية يقعدوك بتاع اسبوع استخدام مثلا
تعليقات
إرسال تعليق
اكتب ما تريد هنا لا تتكاسل