المصري معروف بجبروته
انهارده روحت بنك اسحب فلوس من ال ATM كنت هسحب حوالى ٤٥٠٠ جنيه ، المهم لما سحبتهم طلعلى فيهم ٣ ورقات ب ٢٠٠ مقطوعين كل واحده مقطوعه فى منطقه غير التانيه ، فطبعاً دخلت لموظف الفرع اقوله يبدلهوملى بفلوس سليمه فارد الموظف بكل برود مينفعش يا فندم و بعدين احنا ايه اللى ضمنا ان المكنه هى اللى قطعت الفلوس مش حضرتك قولتله ما تراجع كاميرا ال ATM هتعرف ، قالى لا عشان نراجع الكاميرات هنضطر نقدم طلب و هياخد وقت على ما يترد عليه ، مرضيتش افتح بوقى بكلمه معاه تانى و خدت بعضى و روحت لمحل صرافه فى سموحة معرفة قديمه تبع الحج و راجل طيب و ابن حلال ، قولتله انا عايز ال ٤٥٠٠ جنيه دول معدن ، قالى هديك ٢٠٠٠ و عدى عليا كمان ساعه الا ربع خد الباقى فا خدت ال ٢٠٠٠ و رحت فرع البنك تانى و رحت للشباك اللى فيه نفس الموظف اللى كلمنى ببرود و قلتله عايز اعمل ايداع قالى ايداع بكام يا فندم قولتله ٢٠٠٠ جنيه قالى تمام هاتهم رحت ماسك الكيس و مفضيله ٢٠٠٠ جنيه معدن على الرخام و قولتله عدهم ، طبعاً استغرب و قالى مينفعش يا فندم و ازاى و ميصحش ، قولتله هو الجنيه ده مش عملة بلدك ؟ قالى اه قولتله يبقى اعمل ايداع و انت ساكت ، مرضيش فا قولتله هاتلى المدير من جوا ، جيه المدير سألنى مالك و ايه مضايقك قولتله الموظف اللى انتوا موقفينه مش راضى يعملى ايداع مع انها عملة بلده و بلده معترفه بيها ، راح المدير خلاه يعمل الايداع و فضل يعد فيهم ساعه ونص رحت سبته وقولتلة هاجيب علبة سجاير من برا واجى و رجعت لمحل الصرافه خدت ال ٢٥٠٠ الباقيين و رحت لنفس الموظف لقيته بينزل برميل عرق و سألته خلصت ؟ قالى اه قولتله عايز اعمل ايداع لدول كمان و فضيتله ٢٥٠٠ جنيه على الرخام و قولتله عد فلوسكوبعد عذاب اخيرا خلص روحت طالع ساحبهم فلوس مجمدة من الماكنة تانى
البوست منقول مش اكتر
تعليقات
إرسال تعليق
اكتب ما تريد هنا لا تتكاسل